ភ្នំពេញ៖ រដ្ឋាភិបាលគ្រោងចំណាយថវិការជាតិសរុបចំនួនជិត ៣៥លានលានរៀល (៣៤ ៧០៨ ៦៣០លានរៀល) ដែលស្មើនឹងប្រមាណ ៨ ៦៧៧ លានដុល្លារ កើនលើសការចំណាយឆ្នាំមុនប្រមាណ៨,៤ភាគរយ។
ការចំណាយកើនឡើងនេះដោយសារការបន្ថែមនូវខ្ទង់ចំណាយបន្ថែមថ្មីទៀតដែលមានដូចជា ការគាំទ្រដល់ការរៀបចំដំណើរការបោះឆ្នោតឃុំ-សង្កាត់ឆ្នាំ២០២២ ការធ្វើជាម្ចាស់ផ្ទះ និងជាប្រធានអាស៊ាននៅឆ្នាំក្រោយ ការគាំទ្រដល់ការថែទាំសុខមាលភាពរបស់កម្មករ និងការចំណាយទប់ទល់ក៏ដូចជាប្រយុទ្ធប្រឆាំងជំងឺកូវីដ-១៩។
ចំពោះទំហំចំណាយវិញ ក្នុងឆ្នាំ២០២២យើងឃើញថារដ្ឋាភិបាលបានទម្លាក់កញ្ចប់ថវិការច្រើនជាងគេទៅឱ្យក្រសួងអប់រំដែលមានតម្លៃប្រមាណជាង ៨៤៥លានដុល្លារ ក្រសួងសុខាភិបាលជាង ៧២២លានដុល្លារ ក្រសួងការពារជាតិជាង ១៣២លានដុល្លារ និងក្រសួងសាធារណៈការជាង ១៣២លានផងដែរ។
គម្រោងថវិការសម្រាប់រដ្ឋបាលថ្នាក់ក្រោមជាតិក្នុងឆ្នាំ២០២២ មានចំនួនប្រមាណ ៣១៥លានដុល្លារ មានការកើនឡើងជិត ២០ភាគរយបើធៀបនឹងឆ្នាំចាស់។
ក្រោមការចំណាយនេះក្រសួងសេដ្ឋកិច្ចបានចាត់ទុកថានឹងធ្វើឱ្យរដ្ឋាភិបាលមានសមត្ថភាពឆ្លើយតបទៅនឹងបញ្ហាប្រឈមនានាទាំងក្នុងនិងក្រៅប្រទេសដើម្បីការពារអាយុជីវិត និងលើកកម្ពស់ជីវភាពរស់នៅរបស់ពលរដ្ឋ ព្រមទាំងស្ដារ និងជំរុញការងើបឡើងវិញនូវកំណើនសេដ្ឋកិច្ចជាតិផងដែរ។
ក្រសួងសេដ្ឋកិច្ចបានលើកឡើងថា៖ «ថវិកាសម្រាប់បន្តការប្រយុទ្ធប្រឆាំង និងការកសាងសមត្ថភាពរបស់នៅជាមួយជំងឺកូវីដ-១៩ តាមគន្លងប្រក្រតីថ្មី ដើម្បីបន្តប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរស់នៅរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្ដារ និងជំរុញកំណើនសេដ្ឋកិច្ចឡើងវិញ» ។
សេចក្ដីព្រាងច្បាប់ស្ពីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ត្រូវបានគណៈរដ្ឋមន្ត្រីសម្រេចអនុម័តកាលពីព្រឹកមិញក្រោមអធិបតីភាពរបស់ សម្ដេចតេជោ ហ៊ុន សែន។ ក្រោយពីអនុម័តដោយគណៈរដ្ឋមន្ត្រីរួចសេចក្ដីព្រាងនេះនឹងត្រូវបញ្ជូនទៅកាន់សភាពិនិត្យនិងអនុម័ត មុននិងត្រូវព្រះមហាក្សត្រឡាយព្រះហស្ថលេខាដាក់ឱ្យប្រើប្រាស់ជាផ្លូវការ៕
